सत्यपथ खबर संवाददाता
फाल्गुन/२७,
लहान। सिरहा जिल्ला अदालतको पूर्वपट्टि तथा बार एसोसिएसन नेपाल, सिरहाको मुनि रहेको सटरमा सञ्चालित ‘ए वन इन्फोटेक्स’ नामक फर्ममा बुधबार बम विस्फोट भएको छ।
घटनामा एक जना सामान्य घाइते भएका छन्। करिब एक घण्टा अगाडि भएको उक्त विस्फोटका बेला फर्मका सञ्चालक मधुसूदनका छोरा सौरव यादव कार्यालयभित्र बसिरहेका थिए। विस्फोट हुँदा सिसाका मसिना टुक्रा लागेर उनको खुट्टामा सामान्य चोट लागेको बताइएको छ।
सोही फर्ममा कार्यरत कर्मचारी गुमस्ता यादवका अनुसार विस्फोट हुँदा कार्यालयभित्र अचानक ठूलो आवाज आएको थियो। त्यसक्रममा फुटेको सिसाका टुक्रा लागेर सौरव यादवको खुट्टामा सामान्य चोट पुगेको हो।
घटनापछि स्थानीय प्रशासन र सुरक्षाकर्मी घटनास्थलमा पुगेर सुरक्षा निगरानी बढाएका छन्। विस्फोट कसरी भयो र कुन प्रकारको पदार्थ प्रयोग गरिएको थियो भन्नेबारे भने हालसम्म खुल्न सकेको छैन।
प्रहरीले घटनाबारे थप अनुसन्धान गरिरहेको जनाएको छ।
