सत्यपथ खबर संवाददाता
चैत्र/०४/२०८२
लहान — नेपाल कम्युनिष्ट पार्टी (एमाले) को जिल्ला सचिवालय बैठक सम्पन्न भएको छ। बैठक सिरहाको चोहर्वा स्थित सामुदायिक भवनमा आयोजना गरिएको थियो।
जिल्ला अध्यक्ष अशोक यादवको अध्यक्षतामा बसेको बैठकमा केन्द्रीय सदस्य तथा मधेस प्रदेश संयोजक एवं सिराहा क्षेत्र नं. ३ बाट हालै सम्पन्न प्रतिनिधि सभा निर्वाचनका प्रत्याशी लीलानाथ श्रेष्ठ, केन्द्रीय सदस्य गंगा यादव लगायतका नेता तथा कार्यकर्ताहरूको सहभागिता रहेको थियो।
बैठकमा सिराहाका चारवटै निर्वाचन क्षेत्रको निर्वाचन परिणामको समीक्षा गर्ने साथै, संगठनभित्र माथिल्लो तहदेखि तल्लो तहसम्मका नेता–कार्यकर्ताहरूका कमीकमजोरीमाथि आलोचना तथा आत्मआलोचना गर्दै संगठनलाई रूपान्तरणसहित जनतामाझ थप प्रभावकारी रूपमा प्रस्तुत गर्ने विषयमा विस्तृत छलफल गरिएको जिल्ला सचिवालय सदस्य देव नारायण साहले वताए।
साहका अनुसार बैठकले आगामी दिनमा संगठनलाई सुदृढ गर्दै जनतासँग प्रत्यक्ष जोडिएर अघि बढ्ने रणनीति तय गरेको छ।
